Maombi ya Shirika la Umeme Tanzania (Tanesco) ya kupandisha bei ya umeme, yamepokewa kwa hisia tofauti za kuungwa mkono na pia kupingwa.
Waungaji mkono maombi hayo ni pamoja na Mbunge wa Nkasi Kaskazini, Ally Kessy aliyesema kulingana na changamoto zinazolikabili shirika hilo, bei ya umeme iongezwe ila kwa kuzingatia kutoa huduma zinazolingana na gharama wanazotoza.
Hata hivyo Shirikisho la Wenye Viwanda (CTI) linapinga maombi
hayo likisema ikiwa ongezeko hilo litakubaliwa, wenye viwanda
watashindwa kumudu gharama hali itakayosababisha baadhi yao kupunguza
wafanyakazi ili kumudu gharama za uendeshaji.
Mjumbe wa Bodi ya CTI,
Dk Samuel Nyantahe alisema hawakubaliani na gharama hizo kupanda
kutokana na mambo ambayo walikubaliana awali ikiwamo kuboresha
miundombinu yao kwanza kutotekelezwa.
Tanesco imeomba kupandisha
gharama za umeme kutoka Sh 198 mpaka Sh 332 kwa uniti moja, ili kumudu
gharama za uendeshaji za shirika hilo.
Kwa upande wake Kessy alisema:
"Karibu robo tatu ya watu wanaiba umeme, lakini hapa sijasikia
mkilizingumzia hilo, sasa inabidi pia mkabiliane na wizi huu, vinginevyo
itakuwa ni kuwabebesha mzigo wananchi wasio wezi wa umeme."
Akiunga
mkono hoja ya Kessy, mdau mwingine Manyerere Jackton alisema viwanda
vingi vimekuwa vikiiba umeme, huku wawekezaji wa viwanda hivyo wakiwa
wanakingiwa kifua na wanasiasa wanapotaka kuchukuliwa hatua.
Hata
hivyo, Shirika la Taifa la Maendeleo (NDC) liliitaka Tanesco kupandisha
gharama za umeme kwa asilimia 90 kwa awamu tatu na kutekeleza ahadi zake
za kutoa huduma bora.
Mkurugenzi wa Utafiti wa NDC, Godwill Wanja
alisema shirika hilo linatakiwa kuongeza bei kwa awamu tatu badala ya
awamu moja, akisema Januari 2014 liongeze asilimia 67.87, Januari 2015
asilimia 12.74 na 2016 asilimia 9.17.
Mkuu wa Wilaya ya Ilala,
Raymond Mushi ambaye alimwakilisha Mkuu wa Mkoa, alisema ufanisi wa
sekta hiyo ni kwa faida ya uchumi wa Tanzania na endapo mapendekezo
hayo yatakubaliwa yatakuwa ni kwa faida ya wananchi, Tanesco na Taifa.
Pia aliitaka Tanesco kutafuta vyanzo vingine vya uzalishaji umeme badala ya kutegemea mafuta na maji pekee.
Kaimu
Mkurugenzi Mtendaji wa Tanesco, Felchesmi Mramba alisema shirika hilo
linaomba kupandisha gharama za umeme ili kukidhi mahitaji na kutoa
huduma bora kwa wateja wake.
Aliongeza kuwa kulingana na gharama za
uzalishaji kupanda, hasara imeongezeka kutoka Sh bilioni 43.43 mwaka
2011 hadi Sh bilioni 178.45 mwaka 2012, hivyo ni sahihi ongezeko hilo
likubaliwe ili iweze kujiendesha kwa faida.
Tanesco imeomba Mamlaka
Udhibiti wa Nishati na Maji (EWURA) kuidhinisha ongezeko hilo pia
kurekebisha bei za huduma za umeme kila baada ya robo mwaka ili kufidia
mabadiliko ya thamani ya fedha za kigeni, bei ya mafuta na mfumuko wa
bei.
"Ikiwa ombi hili halitaridhiwa, shirika litashindwa kumudu
gharama za uendeshaji na hivyo kutokidhi mahitaji makubwa ya umeme
nchini na kutoa huduma zenye ubora unaokubalika kimataifa," aliongeza.
Alisema
ongezeko hilo lina manufaa kwa wateja, kwani Tanesco itanunua vifaa vya
kutosha kukidhi ongezeko kubwa la wateja, kuboresha mifumo ya
usafirishaji na usambazaji umeme ili kupunguza kukatika kwa umeme.
Alisema
bei isipoongezwa, kutakuwa na athari mbaya kwa shirika hilo kwani
litashindwa kumudu gharama za kuendesha mitambo inayotumia mafuta ambayo
ndiyo inakidhi mahitaji kwa sasa.
