Stars Kuivaa Uganda Robo Fainali ya kombe la Chalenji...

Zanzibar Heroes imeng’olewa kwenye michuano ya Chalenji huku Kilimanjaro Stars ikiivaa Uganda Jumamosi mjini Mombasa kwenye mechi ya robo fainali.

Wazanzibari waling’olewa jana Alhamisi baada ya Rwanda kuifunga Eritrea bao 1-0 mjini Machakos.

Zanzibar ambayo ilimaliza mechi zake Jumanne ikiwa na pointi tatu ilikuwa ikisubiria mechi ya jana ili kujua kama watapenya kwa tiketi ya upendeleo ya Cecafa ambayo ilikuwa ikiwaniwa na Burundi, Rwanda na Zanzibar.

Kocha wa Zanzibar, Salum Bausi amelalamikia kitendo cha mechi za mwisho kuchezeshwa kwa siku tofauti badala ya kuchezeshwa siku moja.

Kwa upande wa Stars ambayo ilifuzu juzi Jumatano baada ya kuichapa Burundi bao 1-0, itacheza na Uganda ambayo imeongoza kundi C baada ya kuifunga Sudan bao 1-0 jana kwenye Uwanja wa Nyayo.

Bao la Uganda lilifungwa katika dakika ya 57 na Khalid Aucho, huku la Rwanda likifungwa na Ndaihuka Michel katika dakika ya 70.